இலங்கை முழுவதும் வேகமாகப் பரவி வரும் சிக்குன்குன்யா மற்றும் டெங்கு நோய்களை ஒழிப்பதற்கான செயல் திட்டம் குறித்த முதற்கட்ட கலந்துரையாடல் இன்று (30.04) மேல் மாகாண ஆளுநர் அலுவலகத்தில் நடைபெற்றது.
மேல் மாகாண ஆளுநர் ஹனீஃப் யூசுப் தலைமையில் நடைபெற்ற இந்தக் கலந்துரையாடலில், மேல் மாகாண பிரதம செயலாளர், மேல் மாகாண சுகாதார அமைச்சின் செயலாளர், மேல் மாகாண சபையின் உள்ளூராட்சி அமைச்சின் செயலாளர், மேல் மாகாண சுகாதார சேவைகள் பணிப்பாளர், கொழும்பு மாநகர சபை அதிகாரிகள் மற்றும் இலங்கை காவல்துறை அதிகாரிகள் கலந்து கொண்டனர்.
மேல் மாகாணத்தில் சிக்குன்குன்யா மற்றும் டெங்கு அச்சுறுத்தலை ஒழிப்பதற்காக ஆளுநர் ஹனீப் யூசுப்”War on Dengue” என்ற தொனிப்பொருளில் ஒரு பணிக்குழுவை நிறுவினார், மேலும் மேல் மாகாண சபையின் சுகாதார அமைச்சின் செயலாளர் எல்.ஏ. கலுகாபுராட்சியை பணிக்குழுவின் தலைவராக நியமித்தார்.
இந்தக் கூட்டத்தில், சிக்குன்குன்யா, டெங்கு உள்ளிட்ட நுளம்புகளால் பரவும் நோய்கள் மற்றும் இந்த நோய்களின் தாக்கத்தைக் குறைக்க எடுக்கக்கூடிய நடவடிக்கைகள் குறித்து விரிவாக கலந்துரையாடப்பட்டது.
மேலும், ஆளுநர் இது தொடர்பாக அனைத்து சாத்தியமான நடவடிக்கைகளையும் எடுப்பதாகவும், இந்தத் திட்டங்களைச் செயல்படுத்த முழு ஆதரவையும் வழங்குவதாகவும் தெரிவித்தார்.